Mbunge wa Masasi mjini, mkoani Mtwara, Geoffrey Mwambe na familia yake wamenusurika kifo baada ya gari lake walilokuwa wakisafiria kuungua moto na kuteketea, akiwa njiani kutokea Dar es Salam kuelekea wilayani Masasi kwenye msiba wa baba yake mzazi .
Tukio hilo limetokea leo majira ya saa sita mchana katika eneo la Mkwajuni wilayani Kilwa, mkoani Lindi.
Kwa mujibu wa taarifa ya kamishna Msaidizi wa Jeshi la Polisi na Kamanda wa Polisi mkoa wa Lindi, ACP Mtatiro Kitinkwi, chanzo cha ajali hiyo kimebainika kuwa ni hitilafu katika mfumo wa umeme ndani ya gari hilo.
Kamanda Kitinkwi amesema gari hilo lilikuwa likiendeshwa na dereva Dionis Aloyce Mwihumbo na katika ajali hiyo ya moto hakuna madhara kwa waliokuwepo ndani ya gari hilo.