Waziri wa Fedha, Mhe. Dkt. Mwigulu Lameck Nchemba, ametoa rai kwa wadau wa maendeleo nchini likiwemo Shirika la Maendeleo la Umoja wa Mataifa (UNDP), kuiunga mkono Serikali katika uelekeo wake wa kuwekeza kwenye sekta za uzalishaji ili kuondoa umaskini kwa wananchi.
Rai hiyo imetolewa Jijini Dodoma wakati alipokutana na kufanya mazungumzo na Mwakilishi Mkazi wa Shirika la Maendeleo la Umoja wa Mataifa nchini Tanzania, Bw.Shigeki Komatsubara ambapo walijadili kuhusu ushirikiano wa kimaendeleo kati ya Serikali na Shirika hilo.
Dkt. Nchemba amesema kuwa taasisi za Kiserikali na zisizo za kiserikali ziunganishe nguvu ili kuwawezesha wananchi katika maeneo ya uzalishaji na sio semina kwa kuwa kuwekeza kwenye semina hakumuondoi mwananchi kwenye umasikini.
Ametoa rai kwa Shirika la UNDP kusaidia kupeleka ujumbe huo kwa wadau wengine, katika kipindi ambacho Serikali imeweka uelekeo kwenye sekta za uzalishaji basi na wadau wengine wote wa maendeleo nchini wachukue mwelekeo huo ili kuweza kuunganisha nguvu katika maeneo hayo ya uzalishaji.
Aidha amesema kuwa katika mazungumzo yao wamejadili maeneo ambayo wanaweza kushirikiana ikiwa ni pamoja na usaidizi wa kitaalamu katika maeneo ya kuongeza uwekezaji ambayo yanaenda sambamba na ajenda kuu ya Rais wa Jamhuri ya Muungano wa Tanzania, Mhe. Dkt.Samia Suluhu Hassan, ya kuongeza uwekezaji unaolenga kuongeza ajira kwa watanzania hasa vijana, ushirikiano katika Dira Mpya ya Maendeleo inayoandaliwa na dhana pana ya Uchumi jumuishi usiomuacha mtu yeyote nyuma.
Kwa upande wake Mwakilishi Mkazi wa Shirika la Maendeleo la Umoja wa Mataifa nchini Tanzania, Bw.Shigeki Komatsubara alisema kuwa anafurahishwa na Tanzania kwa kuwa inasonga mbele kutoka uchumi wa chini na kuwa uchumi wa kati.
Amesema Tanzania ni miongoni mwa nchi chache ambazo zinampa ujasiri kusema ni rahisi uchumi wake kukua kwa kuwa unajengwa kwenye amani, umoja na mshikamano, ambapo jumuiya za kimataifa zinathamini hali hiyo na pia zinamatarajio makubwa kuwa Tanzania itaendelea kuzalisha taarifa nzuri kwa Afrika na Dunia kwa ujumla na kujenga Uchumi jumuishi.