Tanzania imeshiriki Mkutano Mkuu wa Kimataifa wa EITI 2026 uliofunguliwa rasmi leo Oktoba 8, 2026, jijini Brussels, Belgium, ukiwakutanisha wawakilishi kutoka zaidi ya nchi 57 zinazotekeleza Matakwa ya Kimataifa ya EITI.
Mkutano huo unajadili namna ya kuimarisha uwazi na uwajibikaji katika usimamizi wa rasilimali za madini, mafuta na gesi asilia, pamoja na kutoa fursa kwa nchi wanachama kubadilishana uzoefu kuhusu utekelezaji wa vigezo vya EITI.
Akifungua mkutano huo, Mwenyekiti wa Bodi ya Kimataifa ya EITI anayemaliza muda wake, Rt. Helen Clark, amesisitiza umuhimu wa ushirikiano kati ya Serikali, kampuni za madini, mafuta na gesi asilia pamoja na asasi za kiraia, ili kuhakikisha rasilimali hizo zinawanufaisha nchi na wananchi kwa ujumla.
Rt. Helen Clark ameongoza Bodi ya Kimataifa ya EITI kwa kipindi cha miaka saba. Kwa upande wake, Mwenyekiti mpya wa EITI, Maria Van der Hoeven, ameahidi kuendelea kushirikiana na nchi wanachama katika kusimamia utekelezaji wa vigezo vya kimataifa vya EITI. Van der Hoeven ataongoza Bodi ya EITI kwa kipindi cha mwaka 2026 hadi 2029.
Kwa upande wa Tanzania, Mwenyekiti wa Kamati ya TEITI, Balozi Wilson Masilingi, amekutana na Katibu Mtendaji wa EITI, Mark Robinson, ambaye ameridhishwa na utekelezaji wa shughuli za EITI nchini na kupongeza jitihada zinazofanywa na Kamati ya TEITI. Tanzania pia imepongezwa kwa kutumia wataalamu wa ndani katika kuandaa ripoti za TEITI za kila mwaka.
Sambamba na mkutano huo, Tanzania imeshiriki katika maonesho yanayoambatana na mkutano huo, ambapo nchi wanachama zimepata fursa ya kuonesha bidhaa na huduma zinazohusiana na utekelezaji wa masuala ya uwazi na uwajibikaji katika sekta ya uziduaji.
Tanzania inatarajiwa kufanyiwa tathmini ya utekelezaji wa shughuli za EITI mwezi Julai 2027. Mkutano huo unatarajiwa kuhitimishwa Oktoba 9, 2026, baada ya kujadili mada mbalimbali zinazolenga kuimarisha ushirikiano na kubadilishana uzoefu katika usimamizi wa rasilimali za madini, mafuta na gesi asilia.