Waziri wa Kilimo, Mhe. Daniel Chongolo, amesema serikali imejipanga kuhakikisha inatatua kwa vitedo changamoto mbalimbali zinazowakabili wakulima nchini.
Amesema wakulima waliwasilisha changamoto mbalimbali zinazokwamisha shughuli zao za kilimo biashara, zikiwemo ubovu wa miundombinu ya masoko, uwepo wa mbolea na mbegu feki, na ukosefu wa teknolojia za kisasa za kuhifadhi mazao ili yasiharibike kabla ya kuwafikia wanunuzi wa ndani na nje ya nchi.
Waziri Chongolo amebainisha haya kwenye ziara yake ya kwanza ya kikazi kwa kutembelea Halmashauri ya Mji Makambako na kuzungumza na wananchi wa Kata ya Maguvani katika Soko la Matema pamoja na Kata ya Mji Mwema katika Soko la Nyanya, ambapo pia amekabidhi mifuko 500 ya saruji kwa ajili ya ukarabati wa Soko la Matema, ikiwemo ujenzi wa vyoo na kizimba cha kuhifadhia taka ndani ya siku 14.
Kwa upande wa Soko la Mji Mwema, Waziri Chongolo ameagiza wataalam wa Wizara ya Kilimo, kupitia taasisi zake—COPRA, ASA, TOSCI, pamoja na wadau wa mnyororo wa thamani, kushughulikia changamoto za soko hilo na kusisitiza umuhimu wa kuwatafutia wakulima masoko ya ndani na nje ya nchi, kuboresha teknolojia za uhifadhi na uongezaji thamani, pamoja na kuhakikisha upatikanaji wa pembejeo bora.
Amebainisha kuwa dhamana aliyopewa ni ya kuhakikisha Watanzania wanapata shibe, lishe na mlo bora, huku wakulima wakiongeza uzalishaji na faida.