Kampuni ya Sukari Kilombero imeendelea kuunga mkono juhudi za kusaidia makundi yenye uhitaji katika Wilaya ya Kilombero, Mkoa wa Morogoro, kwa kukabidhi kilo 4,000 za sukari kwa Shirika la Masista wa Franciscan Sisters of Charity kupitia Upendo Sisters’ Bakery.
Msaada huo unatarajiwa kunufaisha zaidi ya watu 1,500 kupitia mpango wa utoaji wa mikate bure kwa watoto, wagonjwa na makundi mengine yenye uhitaji.
Hatua hii ni sehemu ya awamu ya kwanza ya ahadi ya mwaka wa pili wa ushirikiano wa miaka mitatu kati ya Kilombero Sugar na Upendo Sisters’ Bakery kwa mwaka wa fedha 2026/27. Awamu ya pili ya mchango wa mwaka huu inatarajiwa kutekelezwa mwakani.
Ushirikiano huu ulianzishwa Novemba 2025, ambapo Kilombero Sugar iliahidi kutoa jumla ya tani 23 za sukari ndani ya miaka mitatu ili kusaidia mpango wa Mikate Bure unaotekelezwa na Upendo Sisters’ Bakery.
Akizungumza wakati wa makabidhiano ya msaada huo, Meneja wa Mawasiliano na Mahusiano na Wadau wa Kilombero Sugar, Victor Byemelwa, alisema ushirikiano wa muda mrefu na wadau wa jamii ni muhimu katika kuhakikisha mahitaji ya makundi yenye uhitaji yanaendelea kushughulikiwa.
“Ushirikiano wetu na Upendo Sisters’ Bakery kupitia Mpango wa Mikate Bure unaonesha dhamira yetu ya kuunga mkono juhudi zinazotokana na jamii zenye matokeo chanya katika maisha ya watu. Kwa kutoa sukari inayotumika kutengeneza mikate, tunasaidia kuendeleza huduma inayowafikia watoto, wagonjwa na makundi mengine yanayotegemea msaada huu. Tunaamini kuwa ushirikiano endelevu unaweza kuleta mabadiliko yenye manufaa kwa jamii,” alisema Byemelwa.
Mpango wa Mikate Bure ulianzishwa mwaka 2001 na unasimamiwa na Masista wa Franciscan Sisters of Charity kupitia Upendo Sisters’ Bakery. Kwa zaidi ya miaka 25, mpango huo umekuwa ukitoa mikate na kifungua kinywa kwa watu wenye uhitaji katika Wilaya ya Kilombero, ukiwafikia wanufaika kupitia vituo na taasisi zaidi ya 25, ikiwemo vituo vya watoto yatima, shule, hospitali na makundi mengine ya kijamii.
Akizungumza katika hafla hiyo, Mkuu wa Wilaya ya Kilombero, Mheshimiwa Dunstan Kyobya, aliipongeza Kilombero Sugar kwa kuendelea kutekeleza ahadi yake na kuunga mkono juhudi za kuboresha ustawi wa jamii.
“Serikali inathamini wadau wanaoshirikiana nayo katika kutatua changamoto zinazozikabili jamii. Mchango wa Kilombero Sugar unaonesha umuhimu wa ushirikiano katika kukabiliana na changamoto za kijamii. Ushirikiano huu ulianza mwaka jana na hadi sasa kampuni imetoa tani 10 za sukari kati ya tani 23 ilizoahidi kuchangia ndani ya miaka mitatu. Ninatoa wito kwa wadau wengine kuiga mfano huu kwa kuwekeza katika juhudi endelevu zinazosaidia makundi yenye uhitaji,” alisema Mheshimiwa Kyobya.
Kwa upande wake, Sr. Raymunda Mgaya, kwa niaba ya Mpango wa Mikate Bure, alisema mahitaji ya jamii yameendelea kuongezeka, hivyo kufanya ushirikiano na wadau kuwa muhimu zaidi katika kuhakikisha huduma zinaendelea kutolewa.
“Mahitaji ya jamii yameongezeka kwa miaka kadhaa, na kufanya ushirikiano kama huu kuwa muhimu zaidi. Tunashukuru sana Kilombero Sugar kwa kuendelea kuwa pamoja nasi na kutusaidia kuendeleza utoaji wa mikate kwa watu wenye uhitaji katika jamii yetu,” alisema Sr. Mgaya.
Kwa mujibu wa ahadi ya miaka mitatu, Kilombero Sugar imepanga kuchangia kilo 6,000 za sukari katika mwaka wa fedha 2025/26, kilo 8,000 mwaka 2026/27 na kilo 9,000 mwaka 2027/28, sawa na jumla ya tani 23. Mchango wa sasa wa kilo 4,000 ni sehemu ya ahadi ya mwaka wa pili na unaonesha mwendelezo wa juhudi za kampuni katika kusaidia huduma zinazolenga kuboresha maisha ya wananchi.
Kupitia ushirikiano huu, Kilombero Sugar inaendelea kushirikiana na wadau wa jamii katika kusaidia upatikanaji wa mahitaji muhimu na kuimarisha ustawi wa makundi yenye uhitaji katika maeneo inayofanyia kazi.